विकास स्तुति

अर्चितानाममूर्त्तानाम  पितृणां दीप्ततेजसाम् |

नमस्यामि सदा तेषां ध्यानिनां दिव्यचक्षुषाम् ||

इन्द्रादीनां च नेतारो दक्षमारीचयोस्त्तथा |

सप्तर्षिणां तथान्येषां तान् नमस्यामि कामदान्||

मन्वादीनां मुनीन्द्राणां सूर्य चन्द्रमसोस्तथा |

तान् नमस्यामहं सर्वान् पितृनप्सूदधावपि ||

नक्षत्राणां ग्रहाणां च वायव्यग्न्योर्नभसस्तथा |

द्यावापृथिव्योश्च तथा नमस्यामि कृतांजलिः ||

देवर्षीणां जनितृश्र्च सर्वलोकनमस्कृतान् |

अक्षय्यस्य सदा दातृन् नमस्येऽहं कृतान्जलिः ||

प्रजापतेः कश्यपाय सोमाय वरुणाय च |

योगेश्वरेभ्यश्च सदा नमस्यामि कृतान्जलिः ||

नमो गणेभ्यः सप्तभ्यस्तथा लोकेषु सप्तसु |

स्वयम्भुवे नमस्यामि ब्रह्मणे योगचक्षुषे ||

सोमाधारान् पितृगणान् योगमूर्त्तिधरांस्तथा |

नमस्यामि तथा सोमं पितरं जगतामहम् ||

अग्निरुपांस्तथैवान्यान् नमस्यामि पितृनहम् |

अग्नीषोममयं विश्वं यत एतदशेषतः||

ये तु तेजसि  ये चैते सोमसूर्याग्निमूर्तयः |

जगत्स्वरुपिणश्चैव तथा ब्रह्मास्वरुपिणः ||

तेभ्योऽखिलेभ्यो योगिभ्यः पितृभ्यो यतमानसः |

नमो नमो नमस्ते मे प्रसीदन्तु स्वधाभुजः ||